தோசை சீரிஸ்... புரதச்சத்து நிறைந்த பச்சை பட்டாணி தோசை!

ஆரோக்கியமான மற்றும் சத்தான உணவை உட்கொள்வது இன்றைய காலகட்டத்தில் மிகவும் அவசியமான ஒன்றாகும். அதிலும் குறிப்பாக புரதச்சத்து நிறைந்த உணவுகள் நம் உடல் வளர்ச்சிக்கும், நோய் எதிர்ப்பு சக்திக்கும் பேருதவி புரிகின்றன. அந்த வகையில் புரோட்டீன் தோசை வரிசையில், எளிமையாகவும் சுவையாகவும் செய்யக்கூடிய ஒன்றுதான் பச்சை பட்டாணி தோசை. இதை எப்படி செய்வது? இதன் நன்மைகள் என்னென்ன? போன்ற தகவலோடு தோசையை சமைத்துக் காட்டுகின்றனர், சமையல் கலைஞர்கள் சீதாராமன் மற்றும் தேவி. பச்சை பட்டாணி தோசை செய்முறை குறித்த முழுமையான தகவலை இங்கே காணலாம்.

செய்முறை

பச்சை பட்டாணி கிரேவி தயாரிப்பு

* காய்ந்த பட்டாணியை 8 மணி நேரம் நன்கு ஊற வைத்து, பின்னர் தேவையான அளவு உப்பு சேர்த்து (அல்லது உப்பு சேர்க்காமலும்) வேக வைத்து எடுத்துக் கொள்ளவும். வேகவைத்த பட்டாணியை மிக்சியில் போட்டு கொரகொரப்பாக அரைத்து தனியே வைத்துக் கொள்ளவும்.

* ஒரு கடாயில் சிறிதளவு எண்ணெய் ஊற்றி சூடாக்கவும்.

* எண்ணெய் காய்ந்ததும் கடுகு, கடலைப்பருப்பு, உளுத்தம் பருப்பு சேர்த்து பொன்னிறமாக வறுக்கவும். தீயை சிம்மில் வைத்து வறுக்க வேண்டும், கருகிவிடக்கூடாது.

வெங்காயம், தக்காளி உள்ளிட்ட மசாலா பொருட்களை வதக்குதல்

* பருப்புகள் சிவந்ததும், பொடியாக நறுக்கிய வெங்காயத்தை சேர்த்து பொன்னிறமாக வதக்கவும்.

* வெங்காயம் நன்கு வதங்கியதும், இஞ்சி பூண்டு விழுதைச் சேர்த்து பச்சை வாசனை போகும்வரை வதக்கவும்.

* இஞ்சி பூண்டு விழுது வதங்கியதும், நறுக்கிய தக்காளியை சேர்த்து நன்கு குழையும்வரை வதக்கவும்.

* இத்துடன் மஞ்சள் தூள் மற்றும் ஒரு சிட்டிகை பெருங்காயத்தூள் சேர்த்து நன்கு கிளறவும். பெருங்காயம் சேர்ப்பது வாயுத் தொல்லையை தவிர்க்க உதவும்.

மாப்பிள்ளை சம்பா அரிசி மாவில் தோசை ஊற்றும் போது...

* மசாலாக்களின் பச்சை வாசனை போனதும், சிறிதளவு தண்ணீர் சேர்த்து கொதிக்க விடவும்.

* தண்ணீர் கொதிக்க ஆரம்பித்ததும், அரைத்து வைத்துள்ள பச்சை பட்டாணி விழுதைச் சேர்த்து நன்கு கிளறி, தண்ணீர் வற்றும்வரை வேகவிடவும். (விரும்பினால், இச்சமயத்தில் ஒரு பச்சை மிளகாயை கீறி போட்டுக் கொள்ளலாம்.)

* கிரேவி கெட்டியாகி எண்ணெய் பிரிந்து வரும்போது, சிறிதளவு கறிவேப்பிலை சேர்த்து ஒரு கிளறு கிளறி அடுப்பை அணைக்கவும்.

தோசை தயாரிப்பு

* தோசைக்கல்லை அடுப்பில் வைத்து சூடாக்கவும்.

* தோசைக் கல் சூடானதும், மாப்பிள்ளை சம்பா அரிசி மாவில் தோசை ஊற்றவும்.

* ஒரு பக்கம் வெந்ததும் மறுபக்கம் திருப்பி போட்டு நன்கு வேக விடவும்.

* தோசை இருபுறமும் வெந்ததும், அதன் மேல் தயார் செய்து வைத்துள்ள பச்சை பட்டாணி கிரேவியை பரப்பவும்.

* சூடான புரதச்சத்து நிறைந்த பச்சை பட்டாணி தோசை தயார்! இதற்கு தனியாக சைட் டிஷ் எதுவும் தேவையில்லை.

தோசை மீது பட்டாணி மசாலாவை பரப்பும் தருணம்...

பச்சை பட்டாணி தோசையின் நன்மைகள்

* பச்சை பட்டாணி தோசை புரதச்சத்து நிறைந்த ஒரு சிறந்த உணவு. இது குழந்தைகள் முதல் பெரியவர்கள் வரை அனைவருக்கும் பிடித்தமானது.

* பாரம்பரிய மாப்பிள்ளை சம்பா அரிசியுடன் பச்சை பட்டாணி சேர்வதால், உடலின் புரதச்சத்து பற்றாக்குறை நீங்கி ஆரோக்கியமான வாழ்க்கை உறுதி செய்யப்படுகிறது. மாப்பிள்ளை சம்பா அரிசி நரம்பு மண்டலத்திற்கு வலிமை அளிக்கிறது.

* கறிவேப்பிலை ஒரு சிறந்த மருந்துப் பொருளாகும். சர்க்கரை நோய் வருவதற்கு முந்தைய நிலையில் இருப்பவர்களுக்கு இது மிகச்சிறந்த மருந்தாகப் பயன்படுகிறது.

* பச்சை பட்டாணி தோசை ஆரோக்கியமானதாகவும், சுவையானதாகவும் இருப்பதால், உணவை மகிழ்ச்சியுடன் ரசித்து உண்ண முடியும்.

* பச்சை பட்டாணி குறிப்பிட்ட சீசனில் மட்டுமே கிடைக்கும் என்பதால், ஆஃப்-சீசனில் காய்ந்த பட்டாணியை பயன்படுத்தியும் சுவையான கிரேவியுடன் கூடிய இந்த தோசையை செய்யலாம்.

இந்த ஆரோக்கியமான மற்றும் சுவையான பச்சை பட்டாணி தோசையை காலை உணவில் சேர்த்து உங்கள் நாளை சிறப்பாக்குங்கள்!