புரோட்டீன் தோசை வரிசை - இந்த வாரம் மூக்கடலை மசாலா தோசை!

இன்றைய வேகமான உலகில், ஆரோக்கியமான மற்றும் சமச்சீரான உணவுமுறைக்கு முக்கியத்துவம் கொடுப்பது மிகவும் அவசியம். குறிப்பாக, உடல் வளர்ச்சிக்கும், நோய் எதிர்ப்பு சக்திக்கும் உதவும் புரதச்சத்து நிறைந்த உணவுகளை உணவில் சேர்த்துக் கொள்ள வேண்டும். அந்த வகையில், வழக்கமான மசால் தோசைக்கு ஒரு ஆரோக்கியமான மற்றும் சுவையான மாற்றாக இருப்பதுதான் மூக்கடலை மசால் தோசை. இந்த தோசை, புரதச்சத்து நிறைந்த மூக்கடலையைக் கொண்டு செய்யப்படுவதால் உடலுக்குத் தேவையான அத்தியாவசிய ஊட்டச்சத்துக்களை வழங்குகிறது. மேலும், இதில் சேர்க்கப்படும் அரிசி வகைகளும் தனித்துவமான ஆரோக்கிய நன்மைகளை கொண்டுள்ளன. சமையல் கலைஞர்கள் சீதாராமன், அஞ்சலி ஆகியோர் இந்த ஆரோக்கியமான மூக்கடலை மசாலா தோசையை எவ்வாறு செய்வது? இதன் நன்மைகள் என்னென்ன? என்று விரிவாக எடுத்துக் கூறுகின்றனர்.

மூக்கடலை மசால் தோசை செய்முறை 

மூக்கடலை மசாலா தயார் செய்தல்:

* ஒரு கடாயில் தேவையான அளவு எண்ணெய் ஊற்றி சூடாக்கவும்.

* கடுகு சேர்த்து பொரிந்ததும், கறிவேப்பிலை சேர்க்கவும்.

* பொடியாக நறுக்கிய வெங்காயம் மற்றும் பச்சை மிளகாயை சேர்த்து பொன்னிறமாக வதக்கவும்.

* அடுத்து, இஞ்சி பூண்டு விழுதை சேர்த்து அதன் பச்சை வாசனை போகும் வரை வதக்கவும்.

* நறுக்கிய தக்காளி மற்றும் தேவையான அளவு உப்பு சேர்த்து நன்கு மசிய வதக்கவும்.

மசாலாவில் மூக்கடலையை சேர்த்தல் 

* இந்த கலவையில் மஞ்சள் தூள், மிளகாய் தூள் மற்றும் பெருங்காயம் சேர்த்து நன்கு கலக்கவும். பெருங்காயம் சேர்ப்பது செரிமானத்தை மேம்படுத்தும்.

* மசாலா பச்சை வாசனை போனதும், சிறிது தண்ணீர் ஊற்றி கிரேவி பதத்திற்கு கொண்டு வரவும்.

* இப்போது, வேகவைத்த மூக்கடலையை மிக்ஸியில் அரைத்து மசாலாவில் சேர்த்து நன்கு கலக்கவும். ஏற்கனவே வேக வைத்ததால், இதனை நீண்ட நேரம் வேக வைக்க வேண்டிய அவசியமில்லை.

தோசை தயாரித்தல்:

* தோசைக்கல்லை அடுப்பில் வைத்து சூடாக்கவும்.

தோசைக்கல் சூடானதும் கருங்குறுவை மாவில் தோசை ஊற்றுதல்

* பின்னர் கருங்குறுவை அரிசியில் தயாரிக்கப்பட்ட தோசை மாவை மெல்லிய தோசையாக ஊற்றவும்.

* ஒரு பக்கம் வெந்ததும், தோசையை திருப்ப வேண்டிய அவசியமில்லை. அதன் மேல், நாம் தயார் செய்து வைத்திருக்கும் மூக்கடலை மசாலாவை பரப்பி, தோசை வெந்ததும் எடுக்கவும்.

இப்போது சத்தான மற்றும் சுவையான மூக்கடலை மசால் தோசை தயார். இதற்கு தனியாக சைடு டிஷ் எதுவும் தேவையில்லை. அப்படியே சாப்பிடலாம்.

மூக்கடலை தோசையின் நன்மைகள்

* மூக்கடலையில் புரதச்சத்து அதிகம் இருப்பதால், தசை வளர்ச்சிக்கும், உடல் ஆரோக்கியத்திற்கும் மிகவும் நல்லது.

* மூக்கடலையை நன்கு ஊறவைத்து, வேகவைத்து சமைப்பதால், வாயுத் தொல்லை ஏற்படும் வாய்ப்புகள் குறையும். மேலும், பெருங்காயம் சேர்ப்பது செரிமானத்தை எளிதாக்கும்.

தோசை வெந்ததும் மூக்கடலை மசாலாவை தடவுதல்... 

* இந்த செய்முறையில் பயன்படுத்தப்படும் கருங்குறுவை அரிசி, உடலுக்கு தேவையான ஊட்டச்சத்தை வழங்குவதோடு, கல்லீரலை வலுப்படுத்தும் தன்மையையும் கொண்டுள்ளது.

* வழக்கமான உருளைக்கிழங்கு மசால் தோசைக்கு பதிலாக, புரதச்சத்து நிறைந்த இந்த மூக்கடலை மசால் தோசையை முயற்சிப்பது ஒரு ஆரோக்கியமான தேர்வாக இருக்கும்.

சத்தான மற்றும் சுவையான இந்த மூக்கடலை மசால் தோசையை நீங்களும் உங்கள் வீட்டில் செய்து பார்த்து, அதன் ஆரோக்கிய நன்மைகளை பெறலாம்.