இம்பாலின் மிதக்கும் தீவுகள் - நம்பமுடியாத மயக்கும் பயணம்!
இம்பால் நகரம் இயற்கை அன்னையின் ஒப்பற்ற அழகையும், காலத்தால் அழியாத வரலாற்றுச் சுவடுகளையும் தன்னகத்தே கொண்டு காண்போரை மெய் மறக்கச் செய்கிறது.;
இந்தியாவின் வடகிழக்கு மாநிலத்தில் இயற்கை எழில் கொஞ்சும் பூமியாகவும், மணிப்பூர் மாநிலத்தின் மகுடமாகவும் திகழும் இம்பால் நகரம், வெறும் தலைநகராக மட்டுமல்லாமல், இயற்கை அன்னையின் ஒப்பற்ற அழகையும், காலத்தால் அழியாத வரலாற்றுச் சுவடுகளையும் தன்னகத்தே கொண்டு காண்போரை மெய் மறக்கச் செய்கிறது. பசுமையான மலைகளால் அரவணைக்கப்படும் இந்நகரின் இடையே வெள்ளிநூல் போல வளைந்து நெளிந்து ஓடும் நதிகளும், மனதை கொள்ளை கொள்ளும் நீரூற்றுப் பள்ளத்தாக்குகளும் தனித்துவமான அழகை சேர்க்கின்றன. இப்படிப்பட்ட இயற்கை அழகையும், தனித்துவமான நில அமைப்பையும் கொண்டுள்ள இம்பால் நகரில் கட்டாயம் பார்க்க வேண்டிய முக்கிய இடங்கள், நகரின் கலாச்சாரம் மற்றும் வரலாறு குறித்த விரிவான தகவல்கள் உள்ளிட்டவற்றை இந்த தொகுப்பில் காணலாம்.
இம்பால்: கலைகளின் கூடாரம்
மணிப்பூரின் தலைநகரான இம்பால், மிகவும் செழிப்பான மற்றும் தனித்துவமான கலாச்சார பாரம்பரியத்தின் உறைவிடமாக திகழ்கிறது. இசை, நடனம், நாடகம் மற்றும் வீரக்கலைகள் இங்கு மக்களின் வாழ்வில் பிரிக்க முடியாத அங்கங்களாக உள்ளன. பல தலைமுறைகளாக போற்றிப் பாதுகாக்கப்பட்டு வரும் இந்த கலை வடிவங்கள், இம்பாலின் ஆன்மாவாகவே கருதப்படுகின்றன. மென்மையான மற்றும் இனிமையான ஒலியால் அனைவரையும் கவர்ந்திழுக்கும் மணிப்பூரி இசையில், பெனா எனப்படும் வில் யாழ், புங் எனும் இருபக்க தோல் கருவி, சங்கு போன்ற பாரம்பரிய இசைக்கருவிகள் முக்கியமாகப் பயன்படுத்தப்படுகின்றன. இதன் மூலம் பக்திப் பாடல்கள், நாட்டுப்புறப் பாடல்கள் மற்றும் பாரம்பரிய நடனங்களுக்கான இசை எனப் பல்வேறு இசை வடிவங்கள் வெளிப்படுகின்றன.
இம்பாலின் ஆன்மாவாக போற்றிப் பாதுகாக்கப்பட்டுவரும் கலை வடிவங்கள்
மணிப்பூரி நடனங்கள் உலக அளவில் புகழ்பெற்றவை. குறிப்பாக ராஸ்லீலா மற்றும் லை ஹரோபா போன்ற பாரம்பரிய நடன வடிவங்கள் தனித்துவமான அழகையும், ஆழமான பொருளையும் வெளிப்படுத்துகின்றன. ராஸ்லீலா, கிருஷ்ணரின் இளமைக்கால லீலைகளையும், ராதையுடனான அவரது தெய்வீகக் காதலையும் சித்தரிக்கும் ஒரு பக்தி நடனமாகும். இந்நிகழ்வின் மெல்லிய இசையும், நளினமான அசைவுகளும், வண்ணமயமான ஆடைகளும் பார்ப்போரை மெய்மறக்கச் செய்யும். அதேபோல், லை ஹரோபா மணிப்பூரின் பழமையான மதமான சனமாகிசத்துடன் தொடர்புடையது. இப்பூமியின் உருவாக்கம் மற்றும் இயற்கையின் சக்திகளை வழிபடும் விதமாக இந்த நடனம் நிகழ்த்தப்படுகிறது. மேலும், ஜத்ரா எனப்படும் தொன்மையான நாடக வடிவம் சமூக மற்றும் புராணக் கதைகளை முகமூடிகள் மற்றும் ஒப்பனைகளுடன் நாடகமாக நடித்துக் காட்டுகிறது. இறுதியாக, மணிப்பூரின் தனித்துவமான வீரக்கலைகளான தாங்தா மற்றும் சரித் சரக் வெறும் சண்டைக் கலைகள் மட்டுமல்லாமல், உடல் மற்றும் மனதை ஒருநிலைப்படுத்தி வலிமையையும், ஒழுக்கத்தையும் போதிக்கும் ஒரு வாழ்க்கை முறையாகவும் மதிக்கப்படுகின்றன.
கலாச்சாரப் பெருமையின் சின்னங்கள்
இம்பாலின் கலாச்சாரத்தில் கைவினைப் பொருட்களுக்கும், பாரம்பரிய உடைகளுக்கும் மிக முக்கியமான இடமுண்டு. இந்த நிலத்தின் தனித்துவமான அடையாளங்களாக இவை திகழ்கின்றன. அழகிய வேலைப்பாடுகளுடன் கூடிய கண்கவர் நெசவு பொருட்கள், வலிமையான மூங்கிலிலும், நேர்த்தியான மரத்திலும் உருவாக்கப்பட்ட கலைப்பொருட்கள், மற்றும் ஒவ்வொரு விழாவிற்கும், சடங்கிற்கும் தனித்துவமான அடையாளத்தை வெளிப்படுத்தும் பாரம்பரிய உடைகள், இம்பால் மக்களின் கலை திறனுக்கு அழியாத சான்றுகளாக விளங்குகின்றன. குறிப்பாக, ஃபானேக் எனப்படும் பெண்களின் பாரம்பரிய உடை, அதன் வண்ணமயமான தோற்றம் மற்றும் தனித்துவமான வேலைப்பாடுகளுக்கு தேசிய அளவில் பெரும் புகழ் பெற்றது. இது மணிப்பூர் பெண்களின் அழகையும், கலாச்சாரத்தையும் உலகிற்கு எடுத்துரைக்கும் ஒரு சின்னமாகும்.
இம்பால் பெண்களின் பாரம்பரிய உடை மற்றும் கைவினைப் பொருட்கள்
அதேபோல் இம்பாலின் தெருக்களில் நாம் உலவும்போது, நம் கண்களைப் பறிக்கும் கலைநயமிக்க கைத்தறிப் பொருட்களும், தொடுவதற்கு மென்மையான மணிப்பூர் கம்பளிகளும் எங்கும் நிறைந்துள்ளன. இவை வெறும் விற்பனைப் பொருட்கள் மட்டுமல்ல; இம்பால் மக்களின் வாழ்வாதாரத்தின் முதுகெலும்பாகவும், அவர்களின் உள்ளார்ந்த கலைத்திறனின் வெளிப்பாடாகவும் திகழ்கின்றன. தலைமுறை தலைமுறையாக பாதுகாக்கப்பட்டு வரும் வடிவங்களையும், நுட்பங்களையும் கொண்டு உருவாக்கப்பட்ட இந்த கைவினைப் பொருட்கள் மற்றும் கம்பளி தொழில்கள், இம்பாலின் பொருளாதாரத்திற்கு வலு சேர்ப்பதுடன், அதன் கலாச்சாரப் பெருமையையும் உலகளவில் பறைசாற்றுகின்றன.
சுற்றுலாப் பயணிகளின் சொர்க்கம்
சத்தமில்லாத அமைதியையும், மனதை மயக்கும் இயற்கை எழிலையும் தேடுவோருக்கு இம்பால் ஒரு வரப்பிரசாதம் போன்றது. பரபரப்பான நகர வாழ்க்கையின் இரைச்சலிலிருந்து விடுபட்டு, சில நாட்கள் அமைதியான சூழலில் மூழ்கித் திளைக்க விரும்பும் சுற்றுலா பயணிகளுக்கு இது ஒரு மிகச் சிறந்த தேர்வாகும். அந்த வகையில் இம்பாலின் வரலாற்றுப் பெருமையை பறைசாற்றும் காங்லா கோட்டை, ஒரு காலத்தில் மணிப்பூர் மன்னர்களின் வலிமை மிக்க ஆட்சி பீடமாக விளங்கியது. வரலாற்றுச் சிறப்புமிக்க இந்த கோட்டைக்குள் நுழைந்ததும், பழமையான அரண்மனைகளின் சிதைவுகள், பல்வேறு புனித ஸ்தலங்கள் மற்றும் அருங்காட்சியகங்கள் நம்மை வேறொரு காலத்திற்கு அழைத்துச் செல்லும். இதுபோலவே மணிப்பூர் மாநில அருங்காட்சியகம் மணிப்பூரின் வளமான வரலாறு, கலை, கலாச்சாரம் மற்றும் பழங்குடியினரின் வாழ்க்கை முறையை வெளிப்படுத்தும் பொக்கிஷமாகத் திகழ்கிறது; இங்கு காட்சிப்படுத்தப்பட்டுள்ள பழங்காலத்து கலைப்பொருட்கள், ஆயுதங்கள், உடைகள் மற்றும் புகைப்படங்கள் மணிப்பூரின் பாரம்பரியத்தை நமக்கு எடுத்துக்காட்டுகின்றன. மேலும் இம்பால் மற்றும் கோஹிமா போர்களில் வீரமரணம் அடைந்தவர்களின் நினைவாக அமைக்கப்பட்டிருக்கும் இரண்டாம் உலகப் போர் கல்லறைகள், அமைதியான தோற்றத்தைக் கொண்டிருந்தாலும், அந்த போரின் கொடுமையையும், தாய்நாட்டிற்காக தங்கள் இன்னுயிரை துறந்த வீரர்களின் உன்னத தியாகத்தையும் நம் மனதை உலுக்கும் வகையில் உணர்த்துகின்றன.
மணிப்பூர் மன்னர்களின் வலிமை மிக்க ஆட்சி பீடமாக விளங்கிய காங்லா கோட்டை
இத்தகைய வரலாற்று நினைவுகளின் பெருமையை தாண்டி, வைணவ சமயத்தின் மிக முக்கியமான வழிபாட்டுத் தலங்களில் ஒன்றான ஸ்ரீ கோவிந்தாஜி கோயில், தனது அற்புதமான கட்டிடக்கலை மற்றும் அமைதியான ஆன்மீகச் சூழலின் வாயிலாக அனைவரையும் கவர்ந்திழுக்கிறது. வடகிழக்கு இந்தியாவின் மிகப்பெரிய ஏரியான லோக்தக் ஏரி மற்றும் உலகின் ஒரே மிதக்கும் தேசியப் பூங்காவான கெய்புல் லாம்ஜாவோ ஆகியவை இப்பகுதியின் தனித்துவமான இயற்கை அழகை உலகிற்கு எடுத்துரைக்கின்றன. குறிப்பாக, லோக்தக் ஏரியின் மேற்பரப்பில் மிதக்கும் புற்கள் மற்றும் தாவரங்களால் உருவாகியுள்ள அழகிய மிதக்கும் தீவுகள் ஒரு விசித்திரமான தோற்றத்தை அளிக்கின்றன. இந்த ஏரியின் நடுவே அமைந்திருக்கும் கெய்புல் லாம்ஜாவோ தேசியப் பூங்காவில், அழிந்து வரும் அபூர்வமான மணிப்பூர் புருவக்கொம்பன் மான் எனப்படும் சங்காய் மான் உள்ளிட்ட பல்வேறு அரிய உயிரினங்களின் அழகை நாம் கண்டு மகிழலாம். இவற்றுடன், உலகிலேயே பெண்களால் மட்டுமே முழுமையாக நடத்தப்படும் மிகப்பெரிய சந்தை என்ற சிறப்பைப் பெற்றுள்ள இமா கெய்தல் தாய்மார்கள் சந்தை ஒரு தனித்துவமான அனுபவத்தை வழங்குகிறது. இந்தச் சந்தையில் பாரம்பரிய கைவினைப் பொருட்கள், உள்ளூர் உணவு வகைகள், கண்கவர் வண்ண ஆடைகள் மற்றும் வீட்டு உபயோகப் பொருட்கள் எனப் பல்வேறு வகையான பொருட்கள் விற்பனை செய்யப்படுகின்றன. இச்சந்தை மணிப்பூர் பெண்களின் தொழில் முனைவு திறனுக்கும், அவர்களின் கலாச்சாரப் பெருமைக்கும் ஒரு சிறந்த எடுத்துக்காட்டாக திகழ்கிறது.
மிதக்கும் தீவு மற்றும் பெண்களால் நடத்தப்படும் பெரிய சந்தை
இப்படிப் பல்வேறு சிறப்புகளையும், வரலாற்றுப் பெருமைகளையும், இயற்கை எழில் கொஞ்சும் அழகையும் தன்னகத்தே கொண்டுள்ள இம்பால் வெறும் நகரமாக மட்டுமின்றி, காலத்தால் அழியாத கலாச்சாரக் கருவூலமாகவும் திகழ்கிறது. ஒவ்வொரு மூலையிலும் ஒரு கதையையும், ஒவ்வொரு காட்சியிலும் இயற்கையின் பேரழகையும் பொதிந்து வைத்துள்ள இம்பால், கலாச்சாரம், இசை, நடனம், நாடகம், வீரக்கலைகள் மற்றும் கைவினைப் பொருட்களின் அழகான சங்கமம். இது மணிப்பூர் மக்களின் தனித்துவமான அடையாளத்தையும், ஆழமான பாரம்பரியத்தையும் உலகிற்கு உரக்கச் சொல்கிறது. அதோடு, இயற்கை அழகை முழுமையாக அனுபவிக்கச் சிறந்த இடமாகவும் விளங்கும் இம்பாலுக்கு வருகை தரும் ஒவ்வொருவரும் இந்த ஒப்பற்ற கலாச்சாரத்தின் சாரத்தை உணராமல் திரும்ப முடியாது.
மணிப்பூர் கூகுள் வரைபடம்